A nosa galería de fotos:

O noso manifesto :  Nós tamén queremos navegar!

¡Estamos de noraboa! O talento do noso alumnado volveu brillar, desta volta no mundo da comunicación. O IES Félix Muriel alzouse co primeiro premio na categoría de Secundaria dos prestixiosos Premios José Hermida de Radio Escolar.

A cronoloxía:

TEASER do noso Cap. 1 de ‘Galicia, o país das Marabillas’.

Making of de ‘Galicia, o país das Marabillas’. A través do “como se fixo” porémoslles rostro ás nosas voces.

A versión amplia do PODCAST ‘Galicia o país das Marabillas’ (20′), aderezado con imaxes que acompañan o audio dos locutores/as e convidadas. Na descrición está a minutaxe de onde aparece cadaquén.

ENLACE A PODCAST 20

A nosa galería de fotos:

Hoxe comeza unha nova andaina  do noso proxecto Galicia, o país das marabillas’ (GpM) co que queremos render especial homenaxe ás e aos nos@s maiores e conservar a Galicia lendaria, máis concretamente o Rianxo lendario. O can do Urco, o Pozo bastón, culí, culí… E que mellor estrea que cunha entrevista a  Maite Mosconi, escritora rianxeira experta na materia!!!!!!!

O alumnado de 2º D entrou ata a cociña durante este terceiro trimestre. Primeiro, fixeron a recollida dunha receita tradicional dunha persoa informante da súa familia ou contorna, logo transcribírona e, posteriormente, traballaron na elaboración dos textos e de cadansúa edición. Asemade, foron investigando e coñecendo un feixe de vocabulario novo co que crearon unhas fichas moi vistosas. Todo o traballo axuntámolo neste volume anexo descargable de 142 páxinas baixo o título de ‘Unha manchea de receitas’ co obxectivo de preservalo e coidalo ao tempo que aprendemos a valorar o patrimonio das persoas que nos anteceden na vida. Oxalá vos guste, é voso!

MancheaReceitas-2D-2024-25Muriel_compressed

O alumnado dos tres 4º da ESO elaboraron este Glosario de noso que recompilaexpresións epalabras que perciben en perigo ben por descoñecemento, por esquecemento ou castelanización. Mergulládevos nel!

GlosariodeNoso-2024-25-Muriel

Rianxo. 16 maio 2025.- Martes e mércores desta semana, o salón de actos do IES Félix Muriel de Rianxo acolleu as cinco exposicións que media ducia de alumnas de 4ºA realizaron para todos os niveis do instituto (agás 2º BAC) sobre o Día das Letras Galegas 2025, dedicado ás cantareiras e a poesía popular oral.

Sentadas en cadansúa cadeira sobre o escenario, adornado de panos e pandeiretas e ata cunha gaita, Xulia Vidal Tubío, Sabela Rial Rego, Celia Rey Losada, Candela Jamardo Resúa, Rita Castiñeiras Suárez e Lucía Bermúdez Alcalde levaron á práctica a chamada aprendizaxe entre iguais ao ser as encargadas de explicarlles ás súas compañeiras e aos seus compañeiros do centro que celebran as Letras Galegas, desde cando se festexan, quen foron homenaxeados nestes 62 anos, só sete edicións foron femininas, incluíndo este, e quen son as cantareiras galardoadas e que é a poesía oral popular.

Ao xeito das fías, das fiadas, dos fiadeiros ou dos fiandóns (reunións que tradicionalmente se facían para fiar e onde se cantaba, bailaba e se realizaban certos xogos populares), as seis alumnas foron instruíndo o resto do instituto a través da súa conversa. Ademais, a presentación incluíu unha gravación da exclusiva recolla que outras dúas alumnas de 4º, Antía Vidal Gómez e Clara Méndez Rial, lles fixeron a dúas veciñas de Dodro, Isaura Garrido Freire, e Rianxo, Maruja Miguéns Lustres.

Deseguido, desenvolveron diversas actividades de interacción do público. Entre o alumnado de 1º e 2º ESO distribuíron un debuxo para corar das cantareiras da web da Academia extraído da obra de teatro, ‘As Ferreñas’ escrita por Paula Carballeira con ilustracións de Nuria Díaz. Co resto de niveis, retáronos a saber que eran as ferreñas, as tarrañolas, o adufe ou o peitoque… e a coñecer os nomes das xuntanzas para divertirse, cantar e bailar.

Posteriormente, escoitáronse as palabras de Castelao por boca da cantadora Sés: “Porque a verdadeira tradición non emana do pasado. Nin está no presente, nin se albisca no porvir. Non é serva do tempo. A tradición é a alma eterna que vive no instinto popular e nas entrañas do chan. A tradición non é a historia. A tradición é a Eternidade” e a voz da homenaxeada Eva Castiñeira cantando ‘Ao pasar pola Coruña’ para pechar co “aí vos vai a despedida, aí vos vai a derradeira, acabouse o chiculate, rompeu a chiculateira”.

Tralas exposicións sempre houbo foliada a cargo do público espontáneo que se animou a cantar o Paxaro Pinto, a Rianxeira e outras coplas coas pandeiretas. Unha festa!