Mañá venres, 3 de novembro, imos realizar unha actividade para conmemorar o Día da ciencia en galego. A data escollida desde o ano 2010 é o 4 de novembro, mais como cae en sábado, organizamos no véspera unha charla-encontro con Cibrán Arxibai, profesor de matemáticas e autor do blog Carta xeométrica, blog de referencia para o mundo da sociolingüística.

Na presentación dese blog di que como vítima da inmersión lingüística en español non ten grandes coñecementos respecto da lingua galega, porén ten ollos e oídos.  Mais nós sabemos que si ten moitos coñecementos, de feito Cibrán é unha das persoas máis informada sobre o que sucede en Galicia a respecto da lingua en relación coa sociedade, é dicir é un analista certeiro, por ser un grande e lúcido observador, da nosa realidade sociolingüística.

No café-restuarante O Vilar, na rúa dabaixo de Rianxo hai unha carta moi especial. E destaca non só por estar en galego (que tamén), feito polo que felicitamos aos propietarios, senón porque ademais fai unha difusión cultural interesante a través dos nomes das súas hamburguesas.

Claro que  a un pódelle gustar moito como escribe Rosalía e logo preferir a hamburguesa Pondal, porque nisto da comida hai pode máis o estómago ca a cabeza.

Estamos arrancando un novo curso e deseñando novas actividades e proxectos. Como vedes continuamos coa nosa revista. Queremos abrir este ano lectivo lembrando que o curso pasado estivemos desenvolvendo no ENDLG un proxecto que chamamos “Antroponimia de Rianxo” no que comezamos unha investigación sobre os apelidos máis frecuentes no noso IES e no concello (xa publicamos aquí varios artigos sobre o tema (1)  (2) e tamén en www.rianxofala.com). Tamén achegamos información sobre as formas castelanizadas e as posibilidades de restituílas ao galego. Para pechar, a profesora da USC Ana Boullón, veu ao centro para dar unha charla con información de interese sobre a orixe e significado dos nosos apelidos. Como amablemente nola cedeu, deixámola aquí para que cadaquén poida vela. Se a queres ver en pdf. cómpre facer clic na imaxe para que se abra. Tamén podes vela en formato vídeo.

Fátima Ordóñez e Laura Conde, alumnas que estudaron 2º de Bacharelato este ano no IES Félix Muriel , estiveron todo o curso traballando na campaña “Normalizando desde a antroponimia” que se desenvolveu dentro do Proxecto do Equipo de normalización de dinamización da lingua galega, titulado “Aspiramos a ser simplemente un paraíso lingüístico”.

A investigación realizada sobre os apelidos de Rianxo presentárona ao I Premio de investigación lingüística e etnográfica sobre lingua e culturas galegas Marcosende e GAÑARON! Onte, 21 de xuño, procedeuse á entrega de premios na Reitoría da Universidade de Vigo a onde acudiu Fátima para recibir da man de Henrique Costas, promotor do Premio, un diploma e mais unha tableta que correspondía ao 1º premio. Parabéns!

Na web da Universidade de Vigo dáse conta da noticia.

Todo o traballo feito dentro desta campaña podedes velo na web RianxoFala, sección Antroponimia.

Polo seu interese, deixamos aquí unha tradución ao galego dun artigo que se publicou en El Español o ano pasado. O título do artigo é “O que agochan os pais españois cando lle falan en inglés aos seus fillos” e xa o subtítulo está moi ben escollido. Non deixedes de lelo, porque aínda que se […]

Non me decato do mundo que me rodea até que me paro a escoitar. Oir é fácil, o difícil é escoitar. Entón decátome de que a xente non estuda castelán, estudia castellano, non come puré de cenoria, senón de zanahoria, non se senta na cadeira, séntase na silla. Dá a impresión de que xa non hai ninguén (ou como diría moita xente “nadie”) que coma cenorias, estude e sente na cadeira. Actividades tan básicas e rutineiras que aparentemente non cambiaron, mais non é o mesmo sentar na cadeira que na silla. Na teoría un galegofalante senta nunha cadeira e un castelanfalante séntase nunha silla. Na práctica moitos galegofalantes abandonaron as cadeiras e agora sentan nas sillas. E non estou falando dos galegofalantes que se cambian ó castelán, senón dos que seguen falando galego, pero sentan nunha silla.

O día 17 de maio conmemórase en Galiza o Día das Letras Galegas, celebrado por vez primeira no ano 1963, coincidindo co centenario da primeira edición de Cantares Gallegos, libro de poemas escrito pola gran figura galega Rosalía de Castro. Malia que este día é, ou debería de ser, un momento no que os galegos e as galegas nos sintamos orgullosos do noso idioma, así como tamén do noso pasado histórico e da nosa literatura, actualmente emprégase sobre todo para promocionar algo que beneficia a uns poucos e encobre totalmente a realidade, ou para exaltar aquilo do que no fondo non se está orgulloso pero co que algúns se queren sentir identificados para realizarse dentro dun grupo ó que non chegan a pertencer.