Aquel neno

4 Decembro, 2013. Por: Onda finada. 2º ESO

Edicións Embora publica este libro de Xosé Neira Vilas, Aquel neno transmite case visualmente o mundo rural no que medrou, un case resumo ou non sei se un compendio das súas obras máis singulares e aclamadas. Estamos novamente ante pinceladas dese neno que vive nunha aldea e conta o que alí sofre, xoga e sente, acompañadas aquelas polas ilustracións de Xosé Vizoso, indispensables neste volume de olladas tenras e delicadas, de olladas a un pasado que nunca se debe esquecer.

Aquelas dúas rapazas irmás, veciñas del, eran moi pobres. Tanto que se alternaban para ir á escola e levar unha roupiña un chisco mellor que os farrapos que usaban nos traballos de casa e do agro. A el doíalle moito iso e falou coa súa curmá, que aínda que non tiña moito deulle unha chambra, unha saia, unhas zapatillas e de alí en diante as dúas irmás puideron ir á escola todos os días.

Biografía:Xosé Neira Vilas naceu en Gres, Vila de Cruces, o 3 de novembro de 1928.

Fillo de labregos, estudou comercio por correspondencia. En 1949 emigrou a Arxentina e entra en contacto con galeguistas como Luís Seoane, Rafael Dieste, Ramón Suárez Picallo, Lorenzo Varela ou Ramón de Valenzuela e en 1953 funda as Mocedades Galeguistas, casa coa escritora Anisia Miranda en 1957 e funda a editorial Follas Novas. En 1961 marcha a Cuba coa súa dona.

Logo de trinta e un anos na illa caribeña, xa xubilados, regresan a Galicia en 1994 para viviren en Gres onde dirixen a Fundación Xosé Neira Vilas e continúan co labor cultural e periodístico.

Xosé Neira Vilas é membro numerario da Real Academia Galega, Doutor Honoris Causa polas Universidades da Coruña e La Habana, Premio da Crítica Española (narrativa) e premio da Crítica Galega (ensaio). Recibiu a medalla Castelao, o Pedrón de Honra, o premio Celanova Casa dos Poetas e o Premio Trasalba (2004), e foi nomeado socio de honra da Asociación de Escritores en Lingua Galega no 1999.

Un comentario en “Aquel neno”

Onda finada. 2º ESO. 22 Xaneiro, 2014 at 13:29

O libro é unha crónica das vivenzas dun neno de hai 70 ou 80 anos. Neste libro descubrimos que a infancia dun neno de agora non ten nadan que ver cos de antes; tamés descubrimos un léxico novo, moitas palabras que non coñeciamos. Algúns de nós ata llas preguntamos a nosos avós. Aquí vos quedan algunhas delas: cangalleira, canaveliña e garnacha.

Só poden engadir comentarios os usuarios autorizados.

Abonarse